تحقیق سے متعلق نوکریاں انسانی ذہن کو تیز رکھتی ہیں ‘ ماہر نفسیات ڈیوک پاٹر
واشنگٹن ۔ آرام کی غرض سے دفتر سے چھٹی لینا اکثر لوگوں کو پسند ہے مگر ایک جدید سائنسی تحقیق میں بتایا گیا ہے کہ دماغی کام کرنے والے افراد کو فائدہ اس میں ہے کہ وہ چھٹی لینے کی بجائے دفتر میں کام کریں ،کیونکہ اس سے ان کی دماغی صلاحیتوں میں اضافہ ہوتا ہے۔ ہم اپنی زندگی کے کئی سال نوکری کی مصروفیات میں صرف کرتے ہیں۔ ایک نئی رپورٹ کے مطابق تنخواہ کے علاوہ بھی نوکری کے کئی فوائد ہو سکتے ہیں۔ ڈیوک یونیورسٹی کے نفسیاتی ماہر گائے پاٹر انسانی دماغ پر سائنسی تحقیق کرتے ہیں۔ ان کا کہنا ہے کہ اگر دماغ کو استعمال میں نہ لاجائے تو اس کی صلاحیتوں میں کمی آجاتی ہے۔ پاٹر کے مطابق ایک نئی تحقیق بتاتی ہے کہ تعلیم اور ذہانت کا جو بھی درجہ ہو، دماغ کو مسلسل طور پر مصروف رکھنے والے پیشوں کے طبی اور نفسیاتی فوائد بڑھاپے میں بھی نمایاں رہتے ہیں۔ وہ کہتے ہیں کہ ہماری تحقیق نے ظاہر کیا ہے کہ ایسی نوکریاں انسانی ذہن کو تیز رکھتی ہیں جن میں تحقیق یا آرگنائیزیشن درکار ہو ، یا مستقل طور پر نئی صورت حال کا سامنا کرنا ہو۔ پاٹر اور ان کے ساتھیوں نے دوسری جنگ عظیم میں شریک ہونے والے ایک ہزار سے زائد ویٹرنز پر تحقیق کی، جنہوں نے فوج میں بھرتی ہونے سے پہلے انٹیلی جنس ٹیسٹ دیئے تھے۔ ساٹھ سال کی عمر سے یہ افراد باقاعدگی سے ذہانت کی جانچ کرنے کے ٹیسٹ میں حصہ لیتے رہے ہیں۔ سائنسی تحقیق کے مطابق ان میں سے کئی افراد جنہوں نے جنگ کے بعد ایسے پیشے اپنائے جن میں ذہنی کاوش زیادہ درکار تھی، اپنی جوانی کے انٹیلی جنس سکور سے بہت آگے جا چکے ہیں۔ اس کے برعکس جسمانی محنت مشقت والے پیشے اپنانے والوں کے سکور عمر کے ساتھ ساتھ گھٹتے گئے۔ پاٹر کا کہنا ہے کہ گو جسمانی مشقت کے اپنے فوائد ہیں،تاہم کا م کی نوعیت کو بھی مد نظر رکھنا چاہیے۔ ان کا کہنا ہے کہ عموما ایسی نوکری ذہن کے لیے فائد مند نہیں ہوتی جس میں ایک ہی کام کو بار بار دہرانا پڑے۔ اس کے برعکس، مسائل حل کرنے اور نئے کام سیکھنے سے دماغ کو زیادہ فائدہوتا ہے۔ ذہنی قابلیت پر پیشے کی نوعیت اور عمر کے اثرات کا جائزہ لینے والا یہ پہلا سائنسی مطالعہ ہے۔ پاٹر کا کہنا ہے کہ ذہنی مشقت والے پیشوں کی مدد سے ڈیمینشیا اور آلزائمر جیسی بیماریوں کا علاج تو نہیں جا سکتا، لیکن ان کے اثرات کو بڑھنے سے روکا ضرور جا سکتا ہے۔
Posted by Editor as Medical & Health at 1:52 AM JST