ڈیرہ اسماعیل خان ، جنازے کے جلوس میں بم دھماکہ ، 10 افراد جاں بحق،25 سے زائد زخمی
ڈیرہ اسماعیل خان میں جمعہ کو بم دھماکے میں کم از کم10 افراد جاں بحق اور 25 سے زیادہ زخمی ہوگئے۔ تفصیلات کے مطابق بم دھماکہ جنازے کے ایک جلوس میں ہوا ۔ گزشتہ رات اسماعیل شاہ نامی شخص کو ٹارگٹ کلنگ کے نتیجے میں قتل کردیا گیا تھا اور اس شخص کے جنازے کا جلوس بنوں روڈ پر کوٹلی امام حسین لے جایا جا رہا تھا کہ صدر بازار کے قریب جلوس میں بم دھماکہ ہو گیا ۔ واقعہ کے بعد شہر میں خوف وہراس پھیل گیا اور مارکیٹیں اوردکانیں بند ہوگئیں ۔ دھماکے کے فوری بعد فائرنگ کی آوازیں بھی سنی گئیں۔ اس سے قبل کی اطلاعات میں کہا گیا تھا کہ یہ ایک خودکش حملہ تھا تاہم صوبائی وزیر اطلاعات میاں افتخار کا کہنا ہے کہ فی الحال دھماکے کی نوعیت کے بارے میں کچھ نہیں کہا جا سکتا ۔ ایک نجی ٹیلی ویژن سے گفتگو کرتے ہوئے انہوں نے کہا کہ صوبائی حکومت اپنی ذمہ داریاں پوری کرے گی اور دھماکے کے ذمہ داران کو قرار واقعی سزا دی جائے گی ۔ ادھرجمعہ کی صبح علامہ نذیر نقوی کو بھی نامعلوم افراد نے قتل کردیا ۔دھماکے میں زخمی ہونے والے افراد کو ڈسٹرکٹ ہیڈ کوارٹر ہسپتال ڈیرہ اسماعیل خان پہنچاد یا گیا ۔مزید۔۔۔۔
باجوڑ: جیٹ طیاروں کی بمباری، افغان کمانڈر شاہ خالد 6 ساتھیوں سمیت ہلاک
باجوڑ ایجنسی کی تحصیل ماموند کے علاقے سپرئی میں جیٹ طیاروں کی بمباری سے افغان کمانڈر شاہ خالد 6 ساتھیوں سمیت ہلاک ہو گئے ہیں، بمباری کے نتیجے میں متعدد شدت پسند زخمی ہو گئے ہیں۔ادھرلوئر دیر کے علاقے چکدرہ میں اسکاؤٹس قلعے پر نامعلوم افراد نے دو راکٹ فائرکیے تاہم کوئی جانی نقصان نہیں ہوا جبکہ سوات کے علاقوں کبل، خوازہ خیلہ،اور مٹہ میں سیکیورٹی فورسز کی جانب سے شدت پسندوں کے ٹھکانوں پر گولہ باری سے ہلاکتوں کا خدشہ ہے۔ کبل میں پندھوریں روز بھی کرفیو برقرار ہے،مینگورہ میں شدت پسندوں نے وڈیو سینٹر اور الیکٹرونکس کی دکانوں کو نذر آتش کر دیا۔ تفصیلات کے مطابق باجوڑ ایجنسی کی تحصیل ماموند کے علاقے سپرئی میں جیٹ طیاروں کی بمباری سے افغان کمانڈر شاہ خالد 6 ساتھیوں سمیت ہلاک ہو گئے ہیں،مزید۔۔۔۔
پاکستان انقلابی عمل سے گزر رہا ہے ، آزاد عدلیہ کے قیام تک وکلاء کی جدوجہد جاری رہے گی
معزول چیف جسٹس افتخار محمد چوہدری نے کہاہے کہ پاکستان ایک انقلابی عمل سے گزر رہا ہے اور یہاں آزاد عدلیہ کے قیام تک وکلاء کی جدوجہد جاری رہے گی ۔ معزول چیف جسٹس افتخار محمد چوہدری نے فلاڈیلفیا میں پنسلوانیہ لاء کالج میں اپنے اعزاز میں دی گئی تقریب سے خطاب کرتے ہوئے کہا کہ انہوںنے جو کچھ کیا وہ قانون اور آئین کی بالا دستی کے لیے کیا ۔انہوں نے کہاکہ وکلاء کی تحریک نے معاشرے کے تمام طبقات کو متحد کر دیا ہے۔مزید۔۔۔۔
قبائلی علاقوں پر امریکی جارحیت میں حکومت اور فوج کی رضا مندی شامل ہے
امیر جماعت اسلامی پاکستان قاضی حسین احمد نے کہا ہے کہ قبائلی علاقوں پر امریکی جارحیت میں حکومت اور فوج کی رضا مندی شامل ہے، ملی بھگت سے پاکستانیوں کا قتل عام ہو رہا ہے ۔امریکی سفیر کو دفترخارجہ طلب کرنا ڈرامہ ہے، زبانی کلامی احتجاج کی اجازت لی گئی ہے ۔ اوباما کے آنے سے کوئی تبدیلی نہیں آئے گی ۔ صیہونی اور متعصب نیو کونز سیاہ فام کو اپنے مقاصد کیلئے استعمال کرنا چاہتے ہیں ۔مزید۔۔۔۔
Posted by Editor in daily photo news