دینی مدارس کے طلبہ مزید امریکی جارحیت برداشت نہیں کریں گے ، پاکستانی سالمیت کی حفاظت اگر پاک فوج نہیں کر سکتی تو ہم خود میدان میں نکلیں گے ، حکمران امریکی غلامی کا کردار ادا کر رہے ہیں
جمعیت طلبہ عربیہ بین الاقوامی اسلامی یونیورسٹی کے مظاہرے سے سید بلال ، حمید اللہ رضوان اور دیگر کا خطاب
اسلام آباد ۔ جمعیت طلبہ عربیہ بین الاقوامی اسلامی یونیورسٹی اسلام آباد کے زیر اہتمام پاکستانی علاقوں میں مسلسل امریکی جارحیت اور بم دھماکوں کے خلاف پریس کلب اسلام آباد کے سامنے مظاہرے سے خطاب کرتے ہوئے جماعت اسلامی ضلع اسلام آباد کے امیر سید محمد بلال نے کہاکہ عوام حکمرانوں کی زبانی احتجاج کو مزید برداشت نہیں کریں گے۔ دفتر خارجہ طلبی نہیں امریکی سفیر کو ملک بدر کیا جائے ۔ حکمران کیا اسلام آباد پر حملے کے منتظر ہیں۔ انہوں نے کہاکہ امریکی آئے روز پاکستانی حدود کی خلاف ورزی کر رہے ہیں اور حکمران صرف بیانات کی حد تک احتجاج کر کے خاموش ہو جاتے ہیں ۔ مظاہرے سے خطاب کرتے ہوئے منتظم جمعیت طلبہ عربیہ اسلامی یونیورسٹی حمید اللہ رضوان نے کہاکہ دینی مدارس کے طلبہ مزید امریکی جارحیت برداشت نہیں کریں گے ۔ اگر حملے بند نہ ہوئے تو مدارس کے طلبہ کو جہاد کی کال دیں گے۔ انہوں نے کہا کہ پاکستان سالمیت کی حفاظت اگر پاک فوج نہیں کر سکتی تو ہم خود میدان میں نکلیں گے ۔ پاکستانی حکمران امریکی غلامی کا کردار ادا کر رہے ہیں ۔ مظاہرین نے لال مسجد سے پریس کلب تک مارچ کیا اور امریکا مردہ باد اور امریکا کا ایک علاج الجہاد الجہاد کے نعرے لگائے
Posted by Editor in Pakistan News