نیا صدر تمام اتحادی جماعتوں کی مشاورت سے بنایا جائے گا

اسلام آباد ۔ مسلم لیگ ن کے صدر و وزیر اعلیٰ پنجاب میاں محمد شہباز شریف نے کہاہے کہ ججوں کی بحالی اس وقت اہم ایشو ہے ۔ پرویز مشرف کو محفوظ راستہ نہیں ملنا چاہیے ۔ آج اسلام آباد ائرپورٹ پر نجی ٹی وی سے گفتگو کرتے ہوئے انہوںنے کہا کہ ججوں کی بحالی اس وقت ایک اہم ایشو ہے۔ دو نومبر کی عدلیہ بحال ہو گی۔ انہوںنے کہا کہ دو نومبر کے ججوں کو بحال کرنا حکومت اور قوم کی ذمہ داری ہے اس کے بعد ہم دوسرے اہم معاملات مہنگائی ، بے روزگاری پر توجہ دیں گے ۔ ان کا کہنا تھا کہ ہمارا اصل امتحان اب شروع ہوا ہے اور عوامی مسائل کو حل کرنا ہماری اولین ترجیح ہے۔ میاں شہباز شریف نے کہا کہ ہماری پارٹی کا شروع دن سے ہی یہ موقف رہا ہے کہ استعفی دینے کے بعد سابق صدر جنرل ( ر ) پرویز مشرف کو محفوظ راستہ نہیں ملنا چاہیے بلکہ ان کا ٹرائل ہونا چاہیے انہوں نے کہا کہ جس آمر نے گزشتہ نو سالوں تک ملک اور عوام پر ناجائز قبضہ کیا اور منتخب جمہوری حکومت کا خاتمہ کیا اس کو کس طرح محفوظ راستہ دیاجاسکتاہے۔ جس نے ملک پر ناجائز قبضہ کرکے اس کو تباہ و برباد کیا اس کو عدالت کے کٹہرے میں لانا چاہیے ۔ انہوں نے کہا کہ نیا صدر تمام اتحادی جماعتوں کی مشاورت سے ہو گا اور ایک ایسا صدر چنا جائے گا جو ملک و قوم کے مفاد میں ہو ۔

Posted by Editor in Pakistan News