حکمران اتحاد ‘ ججز کی بحالی ، صدارتی عہدے پر نامزدگی کے حوالے سے کسی نتیجے پر نہ پہنچ سکا

اسلام آباد ۔۔ حکمران اتحاد ججز کی بحالی ،صدارتی عہدے پر نامزدگی کے حوالے سے کسی نتیجے پر نہ پہنچ سکا۔تاہم ججز کی بحالی کیلئے پاکستان مسلم لیگ(ن) نے حکمران جماعت پاکستان پیپلز پارٹی کو 24گھنٹوں کا الٹی میٹم دے دیاہے۔حکمران اتحاد کا اہم اجلاس پیر کو زرداری ہاؤس اسلام آباد میں منعقدہوا۔اجلاس چار گھنٹوں سے زائد وقت تک جاری رہا اجلاس میں پی پی پی کے شریک چیئرمین آصف علی زرداری ، پاکستان مسلم لیگ (ن) کے قائد میاں محمد نواز شریف ، پی پی پی کے چیئرمین بلاول بھٹو زرداری ، وزیراعلیٰ پنجاب میاں محمد شہباز شریف ، جے یو آئی (ف) کے سربراہ مولانا فضل الرحمن ، عوامی نیشنل پارٹی کے صدر اسفند یار ولی خان ، خواجہ محمد آصف ، چوہدری نثار علی خان ، سینیٹر اسحاق ڈار ،میاںرضا ربانی ، شیری رحمن اور دیگر رہنماؤںنے شرکت کی ۔ ذرائع کے مطابق اجلاس میں ججز کی بحالی، صدارتی عہدے کیلئے نامزدگی ، صوبوں میں گورنروں کی تبدیلی، اعلیٰ بیورو کریسی میں رد وبدل ، وفاقی کابینہ میں ممکنہ توسیع سمیت دیگر ایشوز کا جائزہ لیا گیا۔تاہم کسی بھی معاملے کے بارے میں کوئی واضح فیصلہ نہیں کیاجاسکا ۔ حکمران اتحاد نے پرویز مشرف کے صدارتی عہدے سے استعفے کے بعد ممکنہ صورتحال کا جائزہ لیا ۔پرویز مشرف کو محفوظ راستہ دینے نہ دینے کا معاملہ بھی زیر غور آیا اور اس حوالے سے اراکین قومی اسمبلی کی جانب سے سامنے آنے والے مطالبات سے متعلق امور پر بھی گفتگو ہوئی ۔ججز کی بحالی کے بارے میں کوئی فیصلہ نہ ہونے پر ذرائع کے مطابق میاں محمد نواز شریف نے اس معاملے کے بارے میں پاکستان پیپلز پارٹی کو چوبیس گھنٹوں کا الٹی میٹم دے دیا ہے

Posted by Editor in Pakistan News