٭۔ ۔ ۔ وکلاء اتحاد اور اتفاق کو قائم رکھیں اور اپنی صفوں میں گڑ بڑ کی سازشیں تیار کرنے والوں کا محاسبہ کریں۔افتخار محمد چوہدری کا ٹیلی فونک خطاب

سیالکوٹ ۔ معزول چیف جسٹس افتخار محمد چودھری نے کہا ہے کہ وکلاء اور سول سوسائٹی نے عدلیہ کی بحالی اور آزادی کیلئے بے مثال جدوجہد کی ہے اور وکلاء نے اس جدوجہد میںتشدد کا سامنا بھی کیا ہے ۔ معزول چیف جسٹس نے کہا کہ عدلیہ کی آزادی کی تحریک میں وکلاء نے ثابت قدم رہ کر جدوجہد کی ہے ۔ ان خیالات کا اظہار انہوں نے جمعرات کے روز ڈسٹرکٹ بار ایسوسی ایشن سیالکوٹ کے علامہ اقبال بار ہال میں ممبران بار سے ٹیلی فونک خطاب کے دوران کیا ۔ صدر ڈسٹرکٹ بار ایسوسی ایشن ارشد محمو دبگو ، سیکرٹری بار رانا محمد امجد ایڈووکیٹ ، فنانس سیکرٹری بار عرفان بھٹی ایڈووکیٹ اور وکلاء کی کثیرتعداد بھی اس موقعہ پرموجود تھی ۔ معزول چیف جسٹس نے کہا کہ میر صادق اور میر جعفر ہر دور میں پیدا ہوئے تاہم یہ بات خوش آئند ہے کہ وکلاء کی تحریک میںکوئی میر جعفر اور میر صادق عدلیہ کی بحالی اور آزادی کی راہ میں حائل افراد کو نہ مل سکیں گے اور نہ ہی انشاء اللہ آئندہ کوئی میر جعفر اور میر صادق وکلاء میں سے کسی کو ملے گا ۔ انہوں نے مزید کہا کہ وکلاء اور سول سوسائٹی کی عدلیہ بحالی تحریک میں میڈیا نے بھی انتہائی مثبت رول ادا کیا ہے جسے فراموش نہیں کیا جاسکتا ۔ انہوں نے کہا کہ وکلاء اتحاد اور اتفاق کو قائم رکھیں اور اپنی صفوں میں گڑ بڑ کی سازشیں تیار کرنے والوں کا محاسبہ کریں اور متحد ہوکر جدوجہد جاری رکھیں انشاء اللہ ان کی کامیابی کے دن اب دور نہ ہیں ۔ معزول چیف جسٹس نے کہا کہ وکلاء اپنے قائدین وکلاء کی قیادت میں جوجدوجہد کررہے ہیں وہ ضرور کامیاب ہوگی ۔ انہوں نے مزید کہا کہ مشکلات کے باوجود وکلاء کا تحریک میں جذبہ سب سے زیادہ ہے ۔ قبل ازیں صدر ڈسٹرکٹ بار ایسوسی ایشن ارشد محمو دبگو اور سیکرٹری بار رانا محمد امجد ایڈووکیٹ نے بھی وکلاء سے خطاب کیا ۔

Posted by Editor as Pakistan News at 11:59 PM JST

تبصرہ کریں »